Валерий Коммунистович Киндиковтыҥ эземине учурлалган мындый атту туштажу Алтыгы Талду јуртта јаан изӱ айдыҥ 17-чи кӱнинде ӧтти.
Ады јарлу јерлежин эске алынарга камык улус јуулдылар: тӧрӧӧн-туугандары, Алтыгы Талду ла Кулады јурттардаҥ јерлештери, школдо кожо ӱренген најылары, Эл драма театрдыҥ артисттери, «Кӧк-бӧрӱ» ойноп турган спортсмендер ле оноҥ до ӧскӧлӧри. Чала бӱрӱҥкӱй ле эмеш јаашту кӱнде јуулган улус Валерий Киндиковты ла ол керегинде кӧп-кӧп учуралдарды эске алындылар…
Туштажуны Алтыгы Талду јурттыҥ јаҥарчылары јаҥар кожоҥыла баштадылар. Туштажуныҥ ӧткӱреечизи Тожыла Енчинов келген улуска артисттиҥ ӧткӧн јолы керегинде куучындап, театрда согулган бир кезек видеоӱзӱктерле таныштырды. Ээчиде сӧсти Алтыгы Талду јурт јеезениҥ јааны Данил Яковлевич Кохоев алды:
- Бӱгӱн бистиҥ јерлежиске, Павел Кучияктыҥ адыла адалган Эл драма театрдыҥ артизине, Россияныҥ Нерелӱ артизине, Валерий Коммунистовичке 65 јаш толор эди. Беш јыл кайра, 2017 јылда, ол бойыныҥ 60 јажын бистиҥ јурттыҥ аралында ӧткӱрерге сӱреен амадаган эди. Је оору-јоболдоҥ улам ак чечектӱ алтайына атана берерде, ол амадузы бӱтпей артып калган. Эмди беш јыл ӧткӧн соҥында, Валерий Коммунистовичтиҥ сыйындары билелериле кожо аказыныҥ бӱтпеген амадузын бӱдӱрип јатканына сӱрекей оморкоп турум.
Учы. Башталганы 1-кы бӱкте
Оҥдой аймактыҥ администрациязыныҥ адынаҥ, аймактыҥ јааныныҥ адынаҥ оныҥ баштапкы ордынчызы Анатолий Атаров келген улусты учурлу кӱнле уткып, мынайда темдектеди:
- Валерий Коммунистович кӱч ӧйлӧрдӧ, 90 јылдарда, театрда ишјалды канча айларла тӧлӧбӧй турган тужында, театр јайрадылып калган тужында, бойыныҥ ижин чачпай, туура барбай апарганы – бистерге сӱрекей оморкодулу. Ол театрдыҥ да, Алтай Республиканыҥ да јӱрӱминде јаан изин артыргызып салган. Оныҥ ойногон камык рольдоры бистиҥ санаабыста јаантайын артып калар.
Каракол јурт јеезениҥ јааны Каска Маиков:
- Бис Валерий Коммунистовичле Караколдыҥ школында 1968 јылдыҥ сыгын айыныҥ баштапкы кӱнинде танышкан болгоныс. Каракол-Коротыныҥ балдары бежинчи «Б» класста, Бичиктӱ-Боомныҥ, Ленјолдыҥ балдары бежинчи «А» класста, Кулады ла Боочы јурттардаҥ келген балдарды эки башка бӧлӱп, «А» ла «Б» класстарга ӱлеген. Оноҥ ло бери 1974 јылга јетире кожо ӱренип, школды божотконыс. Валера кылыгы јакшы, јымжак, токыналу болгон, биске кӧрӧ, ӱредӱзи јакшы. Ӱредӱчилер де оны сӱӱйтен, Валеранаҥ тем алзын деп, биске јаантайын айдатан. Валерий Коммунистович бӱткӱлинче талантту кижи болгон дезе, јастыра болбос. Кайда да барза, кемле де кожо болзо, улустыҥ кӱӱн-санаазын кӧдӱрер, ойын-кокырды баштаар кижи болгон.
Амат Могулчин, Шыргайты јурттаҥ ады-јарлу кӧк-бӧрӱчи:
- Валерий Коммунистовичле бис кӧк-бӧрӱ ойноп, таныжып алганыс. Мен ол кижини јаантайын Валера-ака деп айдып туратам. Эл Ойын да болзын, чемпионаттар да болзын, Улаган да, Оҥдой до аймак болзын, Валера-ака јаантайын бистиҥ станга келип, эзендежип турар, кӱӱн-санаабыс коомой болзо, кӧдӱрип ийер. Маргаандар алдында бис ого телефон согуп, «койды сойып алганыс, слерди сакып јадыс» деп кычырып туратаныс. Ол кижи келзе ле, бистиҥ станда тал-табыш, сӱӱнчи, кӧстиҥ јажы тоголонгончо каткырарыс. Валера-акабыстыҥ јылдызы качан да ӧчпӧс, ол бистиҥ кӧгӱзисте качан да ундылбас!
Туштажуга келген улуска Айдар Унатов, Анастасия ла Байнур Хабаровтор, Жанетта ла Мансур Тоновтор, Каракол јурттыҥ культишчилери бойыныҥ ойындарын кӧргӱстилер. Павел Кедечинов, Кыдраш Шумаров, Тожыла Енчинов, Качанак Багыров, Евгений Папитов, Карабаш Майманов ло Эл драма театрдыҥ ӧскӧ дӧ артисттери Валерий Киндиковты эске алындылар, ӱлгерлер кычырдылар. Анайда ок артисттиҥ јуук улузы: эш-нӧкӧри Райгуль Киндикова, сыйны Римма Коммунистовна, ӧскӧ дӧ тӧрӧӧн-туугандары, најылары сценага чыгып, јайалталу артистти эзедип, келген улуска јуулганы учун јаан быйанын айттылар.
http://ажуда.рф/